當年呢套劇卡士強勁，周星馳嘅無厘頭搞笑演繹，加上金句百出，令佢當年成功彈起。唔少劇中演員至今仍然活躍於娛樂圈，今日同大家數下佢哋嘅去向啦！
 
李香琴（何美麗）
大家對李香琴(琴姐)呢個名應該都唔陌生，佢係《他來自江湖》中飾演何鑫淼(周星馳飾)嘅姑媽。琴姐十六歲就踏上舞台，從藝超過70年，到而家嘅歲數都仲有零食廣告商搵佢拍廣告，證明佢嘅仲好有market。
 
萬梓良（明天）
萬梓良其實係《他來自江湖》嘅男主角，但係風頭就俾周星馳搶咗唔少。劇中飾演周星馳嘅表哥兼崇拜對象，先後與余姣(恬妞)和阮黛玉(毛舜筠)有感情線。曾經攞過金馬影帝嘅佢，八九十年代叱吒香港以及台灣電視電影圈。曾經同恬妞結婚，仲喺TVB現場直播，但係4年後離婚收場。近年萬子主力打理生意，間中先拍劇。
 
毛舜筠（阮黛玉）
何鑫淼個表姨，初頭對明天誤解好深，後嚟發展成為戀人。毛舜筠係出名嘅大美人，令當時紅極一時嘅張國榮同周星馳都拜倒佢嘅石榴裙下。不過人始終都敵唔過時間，今年55歲嘅佢被指疑似執樣重手咗，搞到塊面膠晒。毛姐近年於加拿大生活，陪同於當地讀書的女兒。
 
恬妞 （余姣）
喺劇中飾演大陸新移民嘅余姣，後來成為女演員更加遠赴美國荷李活發展。現實生活中最為人熟悉嘅就係佢同萬梓良嘅一段婚姻，不過最後二人因性格不合而離婚。而家恬妞專注內地發展。
 
張鳳妮（洪少娟）
外號「弗得娟」，劇中飾演有吸食軟性毒品習慣嘅「愛俏屋美容院」美容師，明戀萬梓良，佢嗰場俾萬子用花灑兜頭淋嘅戲，相信重播時一定再次引起話題！1987年及1989年參加選美，後來簽約無綫。佢1997年去咗馬來西亞，其後就嫁咗俾豪門商人傅仰峰，定居吉隆坡，現已淡出娛樂圈。
 
吳孟達（何小英）
飾演何鑫淼(周星馳飾)嘅爸爸，當然同周星馳有好多對手戲啦，同時亦培養出佢同周星馳嘅默契。上年因心臟衰竭被送入ICU，考慮健康問題後決定停止接戲。


 
周星馳（何鑫淼）
憑著《他來自江湖》跑出，其實之前嘅《蓋世豪俠》已經好引人注目。星運扶搖直上後，拍咗好多套膾炙人口嘅經典喜劇。現時佢已經進化到自己做導演兼監製開戲，套套都好收得。雖然近年好低調，但久唔久就會有是非，好似之前就被向太狂鬧咁。
早排有傳內地大型明星出道實境節目《星動亞洲》開出半億人民幣天價，力邀周星馳擔當明星導師。而星爺亦想搵出具潛力嘅新人，所以已經答應咗。唔通又可以喺電視機入面見到星爺？！
 
梅小惠（司徒佩芝）
同周星馳飾演歡喜冤家，而呢套劇亦係佢嘅代表作。佢拍完《皆大歡喜》後，就開始淡出演藝界，只會耐唔耐先出現喺電視螢幕。但係佢仍然有唔少圈中好友，尤其是係阮兆祥。近排仲俾人踢爆佢哋聯名買樓添！
 
梁芷珊（林美琪）
只出演過一套電視劇集嘅梁芷珊，戲入面做黃秋生女友。佢曾經做過Model、寫過小說，仲識填詞！2002年嘅時候同富商羅傑承結婚，而家羅生間公司，芷珊都有份打點。